2026/08/24
२०८०-०८-१२
सुदूरपश्चिम प्रदेशका मुख्यमन्त्री कमलबहादुर शाहका बुवा मंगलबहादुर शाहले ८४ वर्षमा प्रवेश गरेको उपलक्ष्यमा आफूले अक्षराम्भ गरेको विद्यालयमा अक्षय कोषको स्थापना गर्नु भएको छ । रामारोशन गाउँपालिका –५ नेटाकोटमा रहेको यशोदा माविबाट उहाँले अक्षराम्भ गर्नुभएको थियो ।
नेपाल प्रहरीको एसएसपी पदबाट अवकास प्राप्त गर्नु भएका शाहले ८४ औं जन्म उत्सवको अवसरमा मंगल चन्द्रा शान्ति नामबाट ७ लाखको अक्षय कोष स्थापना गर्नु भएको हो ।
दुइ श्रीमती चन्दा र शान्ति र आफ्नो नामसमेत जोडेर उहाँले गरिब , जेहेन्दार विद्यार्थीको सहयोगार्थ अक्षय कोष स्थापना गर्नु भएको हो । नेपाल प्रहरीको जागिरमा रहँदा नै उहाँले गोर्खा बाहु चौंथो र गोर्खा बाहु पाचौंबाट पुरस्कृत भएर सम्मान पनि पाउनु भएको थियो ।
नेपाल प्रहरीको जागिरे जीवनमा भएका बेलादेखि नै उहाँ सामाजिक काममा सक्रिय हुनु भएको प्रेरणाले नै आफू पनि राजनीतिमा होमीएको उहाँका छोरा एवं सुदूपश्चिम प्रदेशका मुख्यमन्त्री कमलबहादुर शाहले बताउनु भयो ।
‘हाम्रै जिजुबुवाले स्थापना गरेको स्कुलमा बुवाले पनि केही गर्न पाए हुन्थ्यो भनिराख्नु भएको थियो । हामी सबै दाजुभाइ र घर परिवारको सल्लाहमा यशोदा माविमा अक्षय कोष स्थापना गर्ने कुरा भएको हो ’ उहाँले भन्नुभयो ,‘लामो समय बुवा प्रहरी सेवामा रहनु भएको बेला पनि जुन ठाउँमा जानुभयो त्यता पनि केही न केही सामाजिक काम गरिराख्नु भएको थियो ।’
पुर्खाको थलोलाई सम्झनको लागि ८४ औं जन्मउत्सवको अवसरमा भोजभतेर तिरको खर्चलाई समाजिक काममा लगाउने बुवाकै चाहनाअनुसार सो कोष स्थापना गरेको उहाँले बताउनु भयो ।
सामाजिक क्षेत्रको जिम्मेवारी लिने बुवाको स्वभाव , लोकतन्त्र र प्रजातन्त्रको पक्षमा आफ्नो बुवाले खेलेको भुमिका नै आफ्नो राजनैतिक जिवनको प्रेरणाको स्रोत भएको मुख्यमन्त्री शाहले बताउनुभयो ।
‘यो अक्षय कोषलाई बढाएर लैजाने पनि सल्लाह भएको छ । अहिले म जहाँ छु त्यो सबै बुवाको प्रेरणाले छु । मेरो सामाजिक , राजनैतिक जीवनको प्रेरणाको स्रोत नै मेरो बुवा हुनुहुन्छ । १९९६ मा जन्मनु भएका शाहको मुख्यमन्त्री कमल शाह गरि ५ छोरा र २ छोरी हुनुहुन्छ ।
